CM-in Ṭamdil Lake Resort a hawng

Chief minister Lalduhoma chuan April 21, Thawhlehni khan Ṭamdilah ZX Eden Ṭamdil Lake Resort a hawng a; Ṭamdil chu ṭha taka enkawl tur leh khualzin hîp thei tura ṭan la turin line department-te a chah.

Lalduhoma chuan, sorkar department enkawl hmun ṭhenkhat luah tlak loh a awm ṭhin avangin mimal enkawltir (privatisation) a ṭul chang a awm thu a sawi a, "He resort pawh hian hma a sawn zawk theih nan Tourism department chuan mimal enkawl turin a hawhtir (outsource) a ni. Ṭamdil hi Mizoram dil neih zinga hmingthang ber pawl a ni a, department pathum - Fisheries, Forest leh Tourism hnuaia enkawl niin, Ṭamdil Management Committee chu DC kaihhruaina hnuaiah din a ni," a ti.

ZX Bamboo and Woodworks hian July 2023 aṭang khan Tourism department aṭangin Ṭamdil an enkawl ṭan a, kum 15 chhung an enkawl dawn. Ṭamdil Lake Resort hawnnaah hian Assembly speaker Lalbiakzama, Fisheries minister Lalthansanga leh Tourism minister Lalnghinglova Hmar te pawh an tel a ni.