COVID-19: Mizoram dinhmun Hripui vei mi 15 hmuh belh a ni

December 23, Nilaini khan Mizoramah Covid-19 vei mi 15 hmuh chhuah a ni a, an zingah natna (Covid-19 symptom) lang mi pahnih leh Mizoram chhunga kai mi panga an tel. Nimin khan hripui laka fihlim tawh mi 16 chhuahtir an ni thung.

Covid-19 vei Nilainia hmuh tharte chu mipa 11 leh hmeichhia pali an ni a; ZMC laboratory-a hmuh mi pakua leh Rapid Antigen Test (RAT) hmanga hmuh mi paruk an ni. TrueNAT-PCR hmangin sample 187 endik ni mah se, hripui vei hmuh chhuah a ni lo.

December 23-a hripui vei hmuh thar mi 15 chu swab sample endik mi 1,175 aṭangin 1.28% a ni a; ZMC laboratory-ah Aizawl district-a mi 300, TrueNAT-PCR hmangin district pariatah mi 187 leh RAT hmangin district pariatah mi 688 endik a ni.

ZMC laboratory-a RT-PCR hmanga Covid-19 vei hmuh chhuah mi pakuate chu mipa pasarih leh hmeichhia pahnih, kum 25-49 inkar an ni a, Aizawl district-a sample lak vek niin, hnam dang pahnih an tel. An zinga pahnih chu tualchhunga hri kai an ni a, symptom nei an awm lo.

RAT hmanga hmuh chhuah mi parukte chu mipa pali leh hmeichhia pahnih, puitling vek an ni a; Aizawl, Lawngtlai leh Vairengtea hmuh chhuah an ni. An zingah tualchhunga hri kai pathum an awm a, tualchhunga kai zinga pahnih chu symptom nei leh hri an kaina hriat loh an ni.

Nimin khan Covid-19 laka fihlim tawh mi 16 chu enkawlna hmun aṭangin chhuahtir an ni a; Aizawl district-ah mi pakhat, Lunglei district-ah mi 10, Lawngtlai district-ah mi panga an chhuak a ni.

Mizoramah swab sample 1,74,742 endik tawh aṭangin Covid-19 positive mi 4,156 (2.38%) hmuh chhuah a ni tawh a, mipa 3,057 leh hmeichhia 1,099 an ni. Nimin tlai dar 5 thleng khan damin mi 4,024 (96.82%) chhuahtir an ni tawh a, mi pariat (0.19%) thi tawhin, enkawl mek mi 124 (2.99%) an awm.

Mizorama Covid-19 positive hmuh chhuah tawh mi 4,156 zinga mi 1,971 chu Mizoram chhunga kai an ni a, mi 2,185 chu state pawn aṭanga rawn lut an ni.

ZMC-a hmuh chhuahte:

ITI Veng - 1: Mipa kum 49, hri kaina hriat, home quarantine lai, symptom nei lo.

Sihphir - 1: Hmeichhia kum 31, CCC-a positive enkawl mek awmpuitu, symptom nei lo.

Bawngkawn - 1: Mipa kum 35, Assam aṭanga haw, quarantine centre-a awm mek, symptom nei lo.

Dinthar - 1: Hmeichhia kum 46, tun hnaia Manipur aṭanga haw, home quarantine lai, symptom nei lo.

Mission Veng - 1: Mipa kum 25, Assam aṭanga haw, quarantine centre-a awm mek, symptom nei lo.

Saron Veng - 1: Mipa kum 40, tun hnaia Assam aṭanga haw, hotel-a khung hran lai, symptom nei lo.

Venghlui - 1: Mipa kum 30, Delhi aṭanga haw, quarantine centre-a awm mek, symptom nei lo.

Silchar - 2: Hnam dang mipa kum 28 & 39; tun hnaia Assam aṭanga rawn lut, quarantine centre-a awm lai, symptom nei lo.

RAT hmanga hmuhte:

Bawngkawn - 1: Hmeichhia kum 50, Bawngkawn South Cultural Centre Kiosk-a hmuh chhuah; symptom nei, hri kaina hriat loh.

Hunthar Veng - 1: Mipa kum 40, private hospital pakhata hmuh chhuah; hri kaina hriat loh, symptom nei lo.

Mampui - 1: Hmeichhia kum 31, tualchhunga kai, hri kaina hriat, symptom nei lo.

Vairengte - 3: Hnam dang mipa kum 25, 26 & 40; West Bengal aṭanga rel kawng siam hna thawk tura rawn lut, Vairengte screening point-a hmuh chhuah, symptom nei lo vek.