Kohhrante'n Krismas an hmang mek

Vawiin December 25 hi Mizo Kristiante hunpui ber, Krismas a ni a, media kaltlangin kohhran hrang hrangte'n hun an hmang dawn. Nizan kha urlawk zan a ni a, media kaltlang vekin kohhrante'n hun an hmang a ni.

Nizan urlawk zanah khan Presbyterian Kohhran chuan Mission Veng biak-inah Christmas Live TV Crusade buatsaihin, Aizawla cable TV-te leh YouTube kaltlangin mipui en tura tihchhuah a ni a; tualchhung kohhran eng emaw zatte pawhin inkhawm neiin, TV leh YouTube kaltlangin an pe chhuak hlawm. Nizan dar 10 khan Salvation Army chuan Coffee Nite an huaihawt bawk.

Vawiin hian kohhran hrang hrangin media kaltlangin inkhawm an buatsaih leh dawn a, chungte chu TV-ah tihchhuah a ni ang.

Zing dar 9-ah Baptist Kohhranin hun an hmang dawn a, Pathian thuchah an sawi dawn bakah, zaithiamte an zai ang. Chawhma dar 10-ah UPC (North East India)-in inkhawm an nei dawn a, Rev. R Lalrinsanga'n thuchah a sawi dawn bakah, zaithiamte an zai dawn.

Chawhma dar 11-ah Presbyterian Kohhranin Christmas Live TV Crusade an chhunzawm leh dawn a, Synod senior executive secretary Rev. Lianhmingthanga'n thuchah a sawi ang.

Chawhnu dar 1-ah Roman Catholic-in hun an hmang dawn a, zan tir lamah Salvation Army leh UPC (Mizoram)-te'n inkhawm an nei ang a; zan dar 8-ah Christmas Live TV Crusade neih leh a ni dawn a, Rev. Vanlalbela'n thu a sawi dawn a ni.