MAL-in an din champha an lawm; Book of the Year lawmman an hlan

Mizo Academy of Letters (MAL) chuan nimin khan IPR Auditorium-ah an din champha an lawm a; Book of the Year 2024 atana an thlan 'Hun inher kara Zofate' tih ziaktu F Vanlalrochana hnenah lawmman an hlan.

Inkhawm hi MAL president Prof. RL Thanmawia'n a kaihruai a, general secretary Dr Zoramdinthara'n report a pe. Khuallian B Lalchhanzova, minister of state-in thu sawi a, Book of the Year 2024 ziaktu hnenah lawmman a hlan bakah, MAL buatsaih ‘Thu leh hla zin kawng’ tih lehkhabu a tlangzarh. Book of the Year hian chawimawina thuchei leh Rs 10,000 a keng a ni.

B Lalchhanzova chuan, MAL chu pawl ngaihsanawm leh hnam ro hlu a nih thu leh Book of the Year dawngtu a chhuan thu a sawi a, "Thuziak ṭha, hringnun kaihruaitu ṭha hi ramin a mamawh a, chu chu kan hman dinchhuah nan pawh a ṭul a, Mizo hnam kan kal zelna turin thu leh hla ṭha kan mamawh a ni," a ti.

Ziakmite chu hnam ro hlu an nih thu leh anmahni rin aia nasain ramin a mamawh thu sawiin Lalchhanzova chuan, "Kan hma lam hun lo kal zel tur atan a êng lam min thlirpui thei ziakmi kan mamawh zel," a ti a; mipuite a êng lam thlirpui thiam ziakmi an awm zel chu lawmawm a tih thu a sawi.

MAL foundation day-ah hian chawhnu lamah Dr Zothanliana thuziak 'Duhlian chungchang' tih zirho a ni.