KHAWTHLIR

Ayush free clinic

AYUSH Directorate chuan National Ayush Mission hnuaia 'Vayo Mitra and National Programme for Prevention and Management of Osteoarthritis and Musculoskeletal Disorders hmangin nimin khan Maubuangah a thlawna inentirna an buatsaih. Free clinic hi Dr Jonathan VL Tlankima'n a ṭhut chilh a, mi 62 inentirin, damdawi an mamawh angte a thlawna pek an ni. Hetiang free clinic hi AMC huam chhungah kalpui a ni tawh a, Aizawl district tuam chhuah tum a ni.

LMV tlan phal lo

Aizawl Traffic SP Stephen Lalrinawma chuan hriattirna chhuahin, Mission Veng aṭanga Salem Veng kaltlanga Venghnuai kawngah lirthei ke li nei (LMV)-te tan tlan phal loh hun (no entry period) a ruahman a; LMV leh a aia liante chu zing dar 8:00 - 9:30 inkarah tlan phal a ni lo tih a tarlang.

Agriculture drone

Lunglei district horticulture officer Lalṭhakima chuan nimin khan Lunglei Lunglawn Communication Centre-ah agriculture drone a tlangzarh. Agriculture drone hi thlai enkawlna damdawi pek theihna leh ram zau zawng teh theihna tur a ni a, Lushai Agriculture Farmers Producer Company (LAPC) hman tur a ni.

PUCET-2025 zo

Pachhunga University College chuan entrance test, PUCET-2025 an zo a; arts, commerce leh management-ah subject 13 atan mi 2,972-in exam an hmachhawn. Kar leh tawp lamah result tihchhuah beisei a ni. PUC hian PUCET-2025 aṭang bakah, India ram pum huap Common University Entrance Test aṭangin zirlai an la dawn a ni.

Ramngaw/nungcha humhalh inzirtir

Champhai Forest Division hnuaia Nature Learning Centre (NLC) chuan nimin khan Champhai Conservator of Forest Auditorium-ah 'Workshop on Nature Conservation and Livelihood Opportunities' an buatsaih a; Champhai leh a chhehvel khaw 12-a khawtlang hruaitute leh pâ (mashroom) khawi lama tui mi 100 vel an tel. Ramngaw leh nungcha humhalh pawimawhna zirho a nih bakah, pa khawi dan inzirtir a ni a, pâ khawina hmanrua leh pa chi sem a ni.