Union Minister hoin Manit district tihhmasawn dan tur sawiho a ni

Union Statistics & Programme Implementation minister of state (independent charge) Rao Inderjit Singh chuan April 22, Thawhlehni khan Aizawla Planning conference hall-ah Mizoram sorkar hotute a kâwm a; aspirational district tihhmasawn ngai pawimawh turin a chah.

Rao Inderjit Singh chuan, India rama state hrang hranga district hnufûm (aspirational district) 112-te tihhmasawnna tur ngai pawimawh turin sorkar hotute a chah a, "NITI Aayog hnuaia hmasawnna tehfung hrang hrang hre chiang u la, awmze nei takin hna kalpui ang che u," a ti.

Union Minister chuan, Mamit DC chu Mamit district-a harsatnate hre chiang a, harsatna sukiang dan tur ṭha ruahman ṭhin turin a chah a; Mizoramah corporate social responsibility (CSR) tam zawk a luh theih nan ṭan a lakpui tur thu a sawi bawk.

Ṭhutkhawmah hian Mizorama aspirational district awm chhun Mamit district-a hmalaknate thlirho a ni a; Planning secretary Lalmalsawma Pachuau, Mamit DC K Laltlawmlova, Economics & Statistics director B Lalrinhlua leh Directorate of Economics & Statistics-a thawktute an tel.

Mizoram dinhmun hriat chianna tura zirchianna (survey) hrang hrang buatsaih tura thawktute tana training mamawh dan leh NITI Aayog hnuaia hmasawnna tehfung hrang hranga Mamit district dinhmun leh hmachhawpte sawiho a ni a; inkalpawhna changtlung zawk peih a nih hunah hmasawnna hna chak zawka kalpui theih beisei a nih thu tarlan a ni.