PHE Minister-in Lunglei tui lâkna a tlawh

Public Health Engineering (PHE) minister Prof. Lalnilawma chuan nimin khan Tlawng leh Pialthleng luia Lunglei châwmtu tui lakna a tlawh a, ṭhál laia Lunglei khawpuia tui harsatna sutkian theih dan tur a bawhzui.

Prof. Lalnilawma chuan, Lunglei châwmtu tui lak mekna Pialthleng luiah ṭhál laiin mipui khamkhawp tui lak tur a awm tawh tih sawiin, "Pialthleng lui leh Tlawng lui infinnaah AMRUT 2.0 aṭangin Tlawng lui tui khuah mek a ni a, metre 13-a sangin a bang rem a ni dawn a, tunah metre 4 vela sang siam a ni tawh. Hun tiam chhung, kumin August thlaa zo turin contractor-te pawh ka ngen a ni," a ti.

Tlawng lui khuah mek chu zawh a nih hunah chuan ṭhál lai pawhin ni 68 chhung vel tui hi pump theih tura ngaih a nih thu sawiin Lalnilawma chuan, "Fûr lai pawha tui tihthianghlimna tur buatsaih mek a ni bawk a, tunah hian a hmunhma laih ṭan tawh a ni," a ti a; khawl thar bun a nih dawn avangin ni khata tui pump chhuah zat pawh tuna mi aiin a lêta a chak dawn thu a sawi.

PHE Minister chuan, "Lunglei khawpui ṭhan zel dan ngaihtuahin tuna tui lakna ringawt ni lo, Mat lui tui lak pawh tunah hian a project peih vek a ni tawh a, a funding tur kan zawng mek," a ti a; Tlawng lui tui pawh tun aia liana khuah theih dan zawn leh mek a nih thu sawiin, "Theihtawp tak meuh kan chhuah a ni," a ti.

Minister Prof. Lalnilawma hi Lunglei HPC vice chairman V Malsawmtluanga, MLA-in a ṭawiawm a; PHE, Lunglei Circle superintending engineer Zohminga leh a thawhpuite'n an hmalak dan hrilhfiahin an kawhhmuh a ni.