Exam avanga zirlaitea rilru hah awm ṭhin chungchang inzirtir

Nimin khan Saitual DC Conference Hall-ah zirlai naupang zinga exam vanga rilru hahna awm ṭhin chungchang inzirtirna- 'District Level Orientation and Sensitization Programme on the Issue of Exam Stress Among Children' chu Pariksha Parv 7.0 hnuaiah neih a ni a, Saitual bawrhsap Dr Lalngura Tlau in a hawng.

Dr Lalngura Tlau chuan India rama zirlai naupangte chuan exam pawimawh tak tak pawl 10 matric exam aṭanga college entrance exam-te leh hna lakna exam thlengin an hmachhawn ṭhin tih sawiin, 'Heng exam-te hian an rilru hriselna nasa takin a nghawng ṭhin a ni," a ti.

Saitual Bawrhsap chuan zirlai naupangte chuan exam an hmachhawnin, an inbuatsaih ṭhat loh vang te, hlawhchham an hlauh vang te, nu leh pa beiseina phak loh an hlauh vangte leh exam chauh rilruah an dah ṭhin avangtein rilru hahna an neih phah ṭhin tih a sawi.

Zirtirtute leh nu leh pate chu naupang rilru hriselna kawngah mawhphurhna sang tak an nei tih sawiin Dr Lalngura Tlau chuan, naupangte chu an mizia leh tui zawng azir zela kai hruai turin a chah.

Inzirtirna hunah hian Saitual district chhunga zirtirtute leh zirlai nu leh pate telin, Saitual DEO & DPC Micky R Lalenkawla chuan kalkhawmte a zirtir.