Agriculture leh Horticulture hotute kâwm

Governor Gen. Dr Vijay Kumar Singh chuan nimin khan Raj Bhavan-ah Agriculture leh Horticulture department hotute a kâwm a; Mizoramah thlai tharte organic a nih leh nih loh finfiahna tur laboratory changtlung tak neih a ṭul thu a sawi.

Gen. VK Singh chuan, lo neih dan daih rei zawk nei tura hmalak a ṭul thu sawiin, "Hmalakna tlo leh tluantling, thing leh mau tichereu lo leh leilung tichhe lo thei ang bera eizawnna kalpui a ngai. Fertilizer tel lo thlai thar kawngah ṭan lak nasat a ṭul a, Mizoramah thlai tharte organic a nih leh nih loh finfiahna tur laboratory changtlung tak neih a ṭul," a ti.

Larsap chuan, loneitute'n hlâwkna tam zawk an neih theih nan indawr tawnna mumal tak ruahman a, thlai sawngbawlna leh thil hlu zawka chantir kawngah ṭan lak thar a pawimawh thu a sawi a; central leh state chhunga line department dangte nen ruahmanna ṭha zawk ngaihtuah zel turin department hotute a chah.

Inkawmnaah hian Agriculture leh Horticulture secretary Ramdinliani, Agriculture director R Lalnunzira, Horticulture director CH Lalmuanpuia leh hotu dangte an tel.

INKAWMHONAA TARLAN ṬHENKHAT

* Sawhthing sawngbawlna tur Integrated Processing Unit pahnih din tura hmalak mek a ni a, sawhthing channa (slicer) 22 leh pho rona (solar dryer) 22 ve ve a awm ang.

* Mizoram zau zawng aṭanga 10% chu agriculture leh horticulture hnuaia hmalak nan hman a ni.

* Tlang ram loneih bànsan a nih theih nan hmalak a ni.

* Organic certification nei tur leh, a nei tawhte tinung thar leh tura senso ngai tam ṭhin lutuk sutkian nan State Certification Body neih a ṭul.

* Mizoramah organic certified area ram hectare 8,000 a zau a awm mek a, hectare 5,500 dang ruahman belh mek a ni.