Kuminah ASF vangin vawk 3,872 thi tawh

Vawk pùl hri, African Swine Fever (ASF) vangin kumin March thla laihâwl vel aṭanga nimin thlengin Mizoramah vawk 2,926 a thih bakah, vawk 946 suat a ni a, kumina ASF kaihhnawiha vawk thi chu 3,872 a ni. Kumina vawk thite nen Mizoramah ASF vanga vawk thi leh suat 1,15,336 a awm tling.

Animal Husbandry & Veterinary (AH&Vety) department-in report a dawn chinah, kumin March thla laihâwl vel aṭanga nimin thleng khan Lunglei, Siaha, Lawngtlai leh Mamit district-a khua/veng 45 chu ASF hri lênna hmun (infected area)-ah puan a ni tawh a; Siaha district-ah hri vanga vawk thi, suat leh infected area a tam ber.

Thla hnih chhungin district palia khua/veng 45-ah hian ASF vangin vawk 2,926 a thi tawh a, vawk 946 suat a ni tawh bawk a, belhkhawmin 3,872 a ni.

Kumina ASF tuar nasa ber Siaha district-ah khua/veng 26 chu infected area-ah puan a ni tawh a, chu'ngah chuan vawk 1,567 a thi tawh a, vawk 583 suat a ni tawh bawk a, a vaiin 2,150 a ni.

Kum 2021 March thla vel khan Mizoramah ASF a lêng leh ṭan a; Mizorama ASF a lên ṭan kum 2021 aṭanga nimin April 23 thleng khan Mizoramah ASF kaihhnawihah vawk 1,15,336 a thi tawh a, chungte chu hri vanga thi 65,123 leh suat 50,213 a ni.