Thubuai ziahluh a tlem; Aizawl khawpui a reh

Covid-19 avangin kuminah Krismas urlawk zan leh Krismas ni kumdang anga hman theih a ni lo a, sorkarin khapna chi hrang hrang a duang a ni. Mizoram sorkar chuan zan dar 8 hnu lam curfew-ah a puang a, December 24 (urlawk zan) khan Aizawl PS hrang hrangah thubuai pahnih chiah ziahluh a ni.

Aizawl SP C Lalruaia hnen aṭanga Vanglaini thudawn danin, urlawk zanah kumdangah chuan khawlaia veivak an tam ṭhin hle a, kuminah erawh curfew puan a nih avangin veivak an tam lo. Urlawk zan hian mi 18 man an ni a, thubuai ziahluh erawh pahnih chiah a awm thung. Urlawk zana mi man leh thubuai ziahluh hi kumdang nena khaikhin chuan a tlem hle.

Aizawl khawpui chhung hmun hran hranah police an duty bakah local level task force-te an huam chhungah duty-in sorkar thupek zawm lo an awm leh awm loh an vil a ni. Hei vang hian khawpui bakah veng kilkhawr zawkte pawh zan dar 8 hnu lamah chuan a reh hle.

Chhun lamah erawh sorkarin Covid-19 avanga zawm tur hrang hrang a duan bak inkhuahkhirhna hranpa siam a ni lo. Nimin chhuna Vanglaini palaiin Aizawl khawpui a fankual lai chuan inkhuahkhirhna dan siam ni lo mah se, khawlaiah lirthei leh mihring vei vak hmuh tur an tlem hle.