COVID-19: Mizoram dinhmun Hripui vei mi 22 hmuh belh a ni

December 24, Ningani khan Mizoramah Covid-19 vei mi 22 hmuh chhuah an ni a, an zingah natna (Covid-19 symptom) lang an awm lo a, Mizoram chhunga kai mi pakua an tel. Nimin khan hripui laka fihlim tawh mi 12 chhuahtir an ni thung.

Covid-19 vei Ningania hmuh tharte chu mipa 16 leh hmeichhia paruk an ni a; ZMC laboratory-a hmuh mi 14, TrueNAT-PCR hmanga hmuh pasarih leh Rapid Antigen Test (RAT) hmanga hmuh mi pakhat an ni.

December 24-a hripui vei hmuh thar mi 22 chu swab sample endik mi 1,014 aṭangin 2.17% a ni a; ZMC laboratory-ah Aizawl district-a mi 669, TrueNAT-PCR hmangin district pasarihah mi 212 leh RAT hmangin district paliah mi 133 endik a ni.

Mi 22 zingah Covid-19 symptom nei an awm lo a, Mizoram chhunga hri kai mi pakua awmin, an zingah hri kaina hriat loh pakhat a awm.

ZMC laboratory-a RT-PCR hmanga Covid-19 vei hmuh chhuah mi 14-te chu mipa pakua leh hmeichhia panga, a naupang ber kum 9 mi, a upa ber kum 57 an ni a, hnam dang paruk an tel. An zinga pasarih chu tualchhunga hri kai an ni a, symptom nei an awm lo.

TrueNAT-PCR hmanga hripui vei hmuh thar mi pasarihte chu mipa paruk leh hmeichhia pakhat, kum 27-49 inkar an ni a, hnam dang pali an tel. Symptom nei lo vek an ni a, an zinga pakhat chu tualchhunga hri kai a ni.

RAT hmanga Covid-19 vei hmuh chhuah awm chhun mi pakhat chu tualchhunga hri kai a nih bakah, hri a kai ṭanna hriat a ni lo.

Nimin khan Covid-19 laka fihlim tawh mi 12 chu enkawlna hmun aṭangin chhuahtir an ni a; Durtlang BSUP CCC aṭangin mi pasarih leh Lawngtlai CCC aṭangin mi panga an chhuak a ni.

Mizoramah swab sample 1,75,756 endik tawh aṭangin Covid-19 positive mi 4,178 (2.38%) hmuh chhuah a ni tawh a, mipa 3,073 leh hmeichhia 1,105 an ni. Nimin tlai dar 5 thleng khan damin mi 4,036 (96.60%) chhuahtir an ni tawh a, mi pariat (0.19%) thi tawhin, enkawl mek mi 134 (3.21%) an awm.

Mizorama Covid-19 positive hmuh chhuah tawh mi 4,178 zinga mi 1,980 chu Mizoram chhunga kai an ni a, mi 2,198 chu state pawn aṭanga rawn lut an ni.

ZMC-a hmuh chhuah:

Dinthar - 3: Mipa kum 9, hmeichhia kum 26 & 57. Tualchhunga kai, tun hnaia +ve hmuh chenpuite, symptom nei lo vek.

Hunthar Veng - 2: Hmeichhia kum 14 & 17; tualchhunga kia, kaina hriat, inkhung lai, symptom nei lo ve ve.

Bawngkawn - 1: Mipa kum 14, a chenpuite zinga +ve hmuh tawh, home quanrantine lai, symptom nei lo.

Electric Veng - 1: Mipa kum 15, a chenpui zinga +ve hmuh tawh, home quanrantine lai, symptom nei lo.

Khanpui - 1: Mipa kum 26, tun hnaia Bihar aṭanga rawn lut, khung hran lai, symptom nei lo.

Tuichawng - 1: Hmeichhia kum 25, tun hnaia Kolkata aṭanga haw, quarantine centre-a awm mek, symptom nei lo.

Sipai - 5: Mipa kum 28-31, Guwahati aṭanga rawn lut, quarantine centre-a awm lai, symptom nei lo vek. Report-ah 'force' tih ringawt a nih avangin eng sipai nge tarlan a ni lo.

TrueNAT-PCR-a hmuh:

Lunglei Rahsi Veng - 1: Mipa kum 30, tualchhunga hri kai, quarantine facility-a awm mek, symptom nei lo.

Lunglei Sazaikawn - 1: Mipa kum 37, tun hnaia J&K aṭanga haw, quarantine facility-a awm lai, symptom nei lo.

BSF, Melte - 3: Mipa kum 39, 45 & 49; tun hnaia state pawn aṭanga lut, quarantine facility-a awm mek, symptom nei lo vek.

South Vanlaiphai - 1: Hmeichhia kum 27, tun hnaia Bangalore aṭanga haw, khung hran lai, symptom nei lo.

ABCI, Tuichang - 1: Hnam dang mipa kum 32, ABCI Infrastructures-a thawk, tun hnaia Assam aṭanga lut, ABCI camp, Tuichanga inkhung mek, symptom nei lo.

RAT hmanga hmuh:

Lunglawn, Lunglei - 1: Mipa kum 27, Aizawl aṭanga zin haw, tualchhunga hri kai, kaina hriat loh, symptom nei lo.