Mizorama private hospital-te'n Health Care Scheme zawm an rem ti
Mizorama mimal leh kohhran damdawi-inte inzawmkhawm pawl, Non-Governmental Hospital Association of Mizoram (NGHAM) chuan Mizoram State Health Care Scheme (MSHCS) chu hun eng emaw chen an zawm theih loh hnuah nimin khan zawm an rem ti.
Thu dawn danin, Health & Family Welfare minister Dr R Lalthangliana'n private hospital-te chu MSHCS zawm turin a ngen nawn leh a; NGHAM chuan an duh dante ziakin nimin khan Health Minister hnenah thehlutin, MSHCS chu zawm an remtih thu an hrilh a ni.
Sorkar thuchhuah tarlan danin, Health Minister chuan sorkar ngennate NGHAM-te'n ngai pawimawh a, mirethei zawkte leh chanhai zawkte hmangaihna rilru pu chunga Mizoram State Health Care Scheme zawm an remti chu thinlung taka a lawm thu a hrilh.Health minister Dr R Lalthangliana chuan, MSHCS thar hman mek chu a bul ṭanna chauh a la nih avangin sawisel bo leh felfai vek a nih a rin bik loh thu sawiin, a nihna anga hman phawt a, siamṭhat ngaite pawh siamṭhat zel a nih tur thu a sawi a; NGHAM-te'n MSHCS chungchanga an ngaimawh záwngte chu a hriat thu leh, an harsatnate sutkian leh chinfel zel a inhuam thu a sawi bawk.
NGHAM hruaitute hian Health Minister ngenna chu nimin khan an ngaihtuah a; Minister-in a ngenna chu zahawm an tih thu leh an pawm thu ziakin an hriattir a, an member hospital 18-te sorkarin empanelment a hlihsakna chu hlihsak turin an ngen nghal bawk. NGHAM ngenna hi Health Minister chuan bawhzui nghalin, Health department official-te a ko a, a rang thei ang bera hma la turin a hrilh a ni.
NGHAM hruaitute chuan, MSHCS an zawm theih loh chhan pakhat - damlo enkawlna rate chungchangah tunah chuan tihdanglam a la awm loh thu an sawi rualin, inhriatthiam tawnnain la siamṭhat theih a nih an beisei thu an sawi a; Health Minister-in MSHCS zawm turin a ngen nasat avangin zahawm an ti a, MSHCS chu zawm phawt mai an remtih thu an sawi bawk.Health & Family Welfare department-in December 4, 2019-a notification a chhuahah, MSHCS Society hnuaia government approved rate anga damlo an enkawl theih loh avangin, MSHCS zawm thei lo private hospital-te chu empanelment hlihsak (suspend) a nih thu a tarlang.
NGHAM pawhin December 2, 2019 khan thuchhuah siamin, chhan hrang hrang avangin MSHCS an zawm theih loh thu an tarlang. NGHAM member-ah hian private hospital 22 an awm a ni.MSHCS zawm theih loh vang hian Mizoram sorkarin a tìrah chuan private hospital 18-te empanelment a hlihsak a, a hnuah private hospital ṭhenkhatin MSHCS an zawm leh avangin empanelment suspend-na chu sût leh a ni a; nimin thlenga private hospital zinga MSHCS zawm lote chu damdawi-in 16 an nia thu dawn a ni.