LS MP-in Defence Minister a kâwm
Lok Sabha MP Richard Vanlalhmangaiha chuan April 24, Ningani tlai khan Union Defence minister of state Sanjay Seth chu a pisaah a kawm a, Mizoram tana ṭangkai tur thil pawimawhte a sawipui.
Richard Vanlalhmangaiha chuan Mizoram Chief Minister-in a ngen tawhna bawhzuiin Mizorama territorial army unit din thuai a nih theih nan hma lakpui turin a ngen a; Sanjay Seth chuan an ngaihtuah thuai tur thu a lo hrilh.
Mizoram chu international border-a awm a nih angin Mizo mipuite'n Indian defence system an hriat chian a ṭul thu sawiin MP Richard-a chuan, Mizoram Journalists' Association (MJA)-te tan India ram hmun hrang hranga defence study tour buatsaih a nih theih nan hma lakpui turin Defence Minister a ngen a; Sanjay Seth chuan hma a lakpui ngei tur thuin a lo chhang a ni
Union MoS for Defence chuan, Richard Vanlalhmangaiha chu Defence committee sang leh pawimawh pahnih - Standing Commitee on Defence leh Consultative committee on Defence-a member a ni ve ve chu a lawmpui thu a sawi a; Indian Defence tana theihtawp chhuaha a hun leh ngaihtuahnate sêng turin a ngen a ni.
Mizoram Lok Sabha MP hian Union minister Sanjay Seth hi hun remchang a neih veleh Mizorama zin turin a sáwm bawk.