Lunglei MZP-in ATL Road dan an tum

Mizo Zirlai Pawl (MZP) Headquarters, Lunglei hruaitute nimina ṭhukhawm chuan sorkara an thil phût a hlawhtlin loh avangin April 28, 2025 (Thawhṭanni) zing dar 7 aṭangin tiam chin awm loin Pukpui daiah Aizawl-Thenzawl-Lunglei (ATL) Road dan an rêl.

Lunglei MZP hian nimin khan emergency meeting an ko a; ATL Road siamna tur sum pawhpên ni 15 chhunga dah lêt tura Mizoram sorkar an phûtah hmalakna a awm loh avangin April 28, 2025 zing dar 7 aṭangin tiam chin awm loin Pukpui daiah ATL Road dan ni se an ti a ni.

MZP Headquarters, Lunglei chuan an hmalakna turah hian Lunglei leh chhim lam mipuite thlawpna leh ṭawiawmna an ngen a; kawngpui an dan chuan zirlai exam te, Fire & Emergency Service te, medical & emergency service leh tui phur lirtheite a huam dawn lo.

Lunglei MZP hian ATL Road siamna tur sum cheng vbc 90.69 zinga vbc 45 chu hmun dangah pawhpên niin an hria a, ATL Road kawng chhe chin chu Kanghmun South leh Kikâwn inkar km. 70 vel a nih laia Pukpui leh Mausen inkar (km. 14) chauh siam tumin sorkarin cheng vbc 45.89 chauh a dah niin an ngai bawk a; chu'ngte chu duh loin April 9, 2025 khan Lungleiah lungawi lohna an lo lantir tawh a ni.