Sorkarin FMR ṭhiah leh ramri hung a duh loh thu CM-in ZORO a hrilh

ZORO hruaitute chuan, Free Movement Regime (FMR) chu a nihna anga dah let a nih theih nan leh India-Myanmar ramri hung a nih loh nan theihtawp chhuah turin Chief Minister an ngen. CM Lalduhoma pawhin FMR ṭhiah leh Myanmar lam ramri hung chu Mizoram sorkar pawhin a duh loh leh dodal a nih thu a lo hrilh tih an tarlang.

Zo Reunification Organisation (ZORO) General Headquarters hruaitute chuan nimin khan Chief Minister chu a pisaah an kâwm a; FMR ṭhiah leh Indo-Burma ramri hung chungchang bakah, an pawl hmalaknate an sawipui a ni.

ZORO chuan, Mizoram leh hnam tana a tawp thlenga do tlang turin Mizoram sorkar an ngen tih sawiin, "Mizoram sorkar pawhin ram pe lo tur leh border fencing hi do tlat a, FMR pawh a nihna anga dah let leh tura theihtawp chhuah turin kan ngen a ni," an ti.

CM Lalduhoma pawhin FMR ṭhiat a, Indo-Burma ramri hung chu Mizoram sorkar pawhin a duh loh leh a dodal a nih thu a sawi bakah, FMR leh ramri hung chungchangah ZORO chu theihtawp chhuahpui a tum thu a sawi tih ZORO chuan an tarlang.

ZORO chuan, India sorkarin Zo fate (indigenous people) inkara daidanna bang siam a tum leh FMR a ṭhiat chu UN Declaration on the Rights of Indigenous Peoples-a Article 36(a) leh (b) kalh a nih thu sawiin, an dem thu an tarlang a, "FMR hi a nihna anga dah let tur leh Indo-Burma border fencing siam lo turin a tawp thlengin India sorkar hmalakna hi kan dodal dawn a, nasa lehzuala dodalna lantir turin kan inbuatsaih mek a ni," an ti.