KHAWTHLIR
Bial inkhawmpui
Mizoram Presbyterian Kohhrana pastor bial hrang hrangte chuan nizan aṭang khan bial inkhawmpui an hmang ṭan a, naktuk Pathianni zanah a ṭiak ang. Bial inkhawmpuiah hian nizan khan palai lawmna leh report inkhawm neih a ni a, vawiinah rorel a ni ang a, zan lamah vantlang Pathian biak inkhawm a awm zui ang. Bial inkhawmpui hi April thla Pathianni vawi lina hmangin neih ṭhin a ni.
Zarkawt chei dan tur Minister-in a en
Aizawl North-III bialtu MLA K Sapdanga, UDPA minister chuan nimin zing khan a bial chhunga Zarkawt khawlai chei dan tur a en a, UDPA director Jacob Lalawmpuia, engineer, Zarkawt Local Council leh ZPM hruaitute'n an ṭawiawm. Minister chuan, Zarkawt chu khawpui hmun laili, Aizawl hmel lanna a nih avangin chei mawi a phu thu a sawi a, "Kuminah Synod inkhawmpui an thleng dawn a, department lam pawhin an ngaih pawimawh ka ring," a ti.
Pa khawi dan zirtir
ICFRE - Bamboo and Rattan Centre (ICFRE-BRC) chuan April 24-25, 2025 chhung khan ICFRE-BRC conference hall-ah pa (mushroom) khawi dan leh enkawl dan bakah, lichen (arsi-êk leh arsi-êk aṭanga thil chawr) chungchang inzirtirna an buatsaih. Zirtiri Residential Science College-a Biochemistry zirlaite an tel a, ICFRE-BRC scientist-D Sandeep Yadav leh master trainer Dr Albana L Chawngthu ten thupui an zirtir ani.
UPC inkhawmpui
UPC North East India inkhawmpui lian ber, General Conference vawi 57-na chu April 24, Ningani zan khan New Siahaa Chhimtuipui District Headquarters local church-ah ṭan a ni a, naktuk Pathianni zanah a ṭiak ang. Inkhawmpui thupui chu 'Tunlai thil awmzia' tih a ni a; nimin khan general department pathum - Missions, Sunday School leh PYD ten ro an rel a ni.
Kawng chanve khâr ṭhin dawn
Bawngkawn-Chanmari (Ramhlun lam) kawng siam hna thawh mekah vawiin April 26 aṭanga May 10, 2025 thleng ni tin chawhma dar 10 aṭanga chawhnu dar 3 inkarah kawng chanve khar ṭhin a ni dawn tih Traffic SP Stephen Lalrinawma'n a tarlang. Hna thawh chhungin kawngpui dungah lirthei dah phal a ni lo.
Pawisa lem man
Assam Rifles sipaite chuan April 24, 2025 khan Lunglei Electric Vengah Lalrinmuana s/o J Lalṭanpuia hnen aṭangin pawisa leh eng emaw zat an man a, Lunglein Police Station-ah an hlan. Pawisa lem hi cheng 500 note 208 a ni.
Fûr atan inbuatsaih
Khawzawl District Disaster Management Authority chu April 24, Ningani khan an chairman K Vanlalṭhiana hoin an ṭhukhawm a, fûr thleng turah chhiatrupna thleng thei laka inven dan tur an sawiho. Chhiatna thleng thei laka inven dan tur mumal leh hmun hlauhawm bik, chhiatna thlen ngunna bikte chiang taka hriat a nih theih nan Village Disaster Management Plan siam an rêl.