Mizorama sikserh vangin Kum 2023-ah mi 13 leh 2024-ah mi 7 thi

Nimin khan Dawrpui Multipurpose Hall-ah World Malaria Day hman a ni a, Health minister Lalrinpuii'n a hmanpui. Minister chuan, Mizoramah sikserh vangin kum 2023 chhungin mi 13 leh kum 2024 chhungin mi pasarih an thih thu a sawi.

Lalrinpuii chuan, World Malaria Day 2025 thupui ‘Malaria ends with us: Reinvest, reimagine, reignite’ tih a nih angin sikserh ûmbo turin ṭan lak thar a ṭul thu a sawi a; Mizoram chu sikserh awm lohnaa puan vat a nih theih nan te, faina leh thianghlimna ngai pawimawh turtein kal khawmte a chah.

Health Minister sawi danin, Mizoramah kum 2023 chhungin sikserh vei mi 18,005 hmuh chhuah niin, mi 13-in an thih phah a, kum 2024 chhungin sikserh vei mi 16,899 hmuh chhuah niin, mi pasarih an thi a ni.

Mihring awm zat aṭanga chhûtin Mizoram chu India rama sikserh vei tamna ber state a nih thu sawiin Lalrinpuii chuan, "Malaria umbo tur hian sorkar, tlawmngai pawl leh khawtlang thawhhona a pawimawh tak zet a ni," a ti.

World Malaria Day hmanna inkhawm hi Health principal director Dr Lalthlengliani'n a kaihruai a, additional director Dr Chawngthanchhunga'n sikserh chungchanga Mizoram dinhmun a tarlang a, sikserh hluarna hmuna khawtlang hruaitute aṭangin an harsatna leh hmalaknate ngaihthlak a ni bawk.

Tarlan danin, Mizoram chu Annual Parasite Incidence (thisen 1,000 endik aṭanga sikserh vei zat)-ah category III-ah a awm mek a; kum 2024 khan API 13.24 niin, Lawngtlai, Lunglei, Mamit leh Siaha district-ahte hian sikserh vei hmuh a tam zual.

Kum 2024 khan sikserh vei mi 16,899 hmuh chhuah a ni a, malaria Pf vei mi 8,950 leh malaria Pv vei mi 7,943 an ni. Hetih lai hian, Mizorama khaw 967 aṭanga khaw 463 chu API-ah 0 a ni a, sikserh vei awm lohna khua tihna a ni.