Mizo zirlaite'n ISRO hmunpui an tlawh

North-East Students Programme for Awareness, Reach and Knowledge on Space (NE-SPARKS) hnuaiah April 22-23, 2025 chhung khan hmarchhak state-a zirlai 100-te'n Bengaluru-a Indian Space Research Organisation (ISRO) hmunpui an tlawh a, Mizoram aṭang zirlai 12 an tel.

NE-SPARKS hnuaiah hian India hmarchhak biala zirlaite tan ISRO hmunpui tlawhna hun buatsaih a ni dawn a, hmarchhak state tin aṭangin zirlai 100 ṭheuhin an tlawh dawn. A thawh khatnaah April 22-23 ah hian Mizoram aṭangin Mizo High School zirlai panga, CLS Academy zirlai panga leh Buhban RMSA Secondary School zirlai pahnihte'n an tel a ni.

Zirlaite hian ISRO hmun hrang hrang - satellite leh space mission hrang hrang an enkawlna (control & command) hmun ISRO Telemetry Tracking and Command Network te, satellite siamna hmunpui UR Rao Satellite Centre te, vansang aṭanga signal lo kalte zir chianna hmun Indian Deep Space Network-te an fang a; ISRO scientist-te nen an inkâwm bawk.

NE-SPARKS hi North East Space Application Centre (NESAC)-in an buaipui a, North Eastern Council (NEC) leh state sorkarte'n sum leh pai an tum a, Mizoram tan Directorate of Science & Technology chu nodal agency a ni.

NE-SPARKS programme-ah hian thla tin batch khat zelin ISRO hmunpui an tlawh ṭhin dawn a, batch tinah hmarchhak state hrang hrang aṭangin zirlai 100 zel an awm dawn. December 2025 thla buatsaih tur a ni a, hmarchhaka zirlai 800 an tel thei dawn a ni.