Kawng hnaih lutuka in sa lo turin chah

Chief minister Lalduhoma chuan, Aizawl Maumuala ram awlte chu mimal hnenah pek a nih dawn loh thu a sawi a; Maumualah in sak phal a nih hunah ram neite chu kawng hnaih lutuka in sa lo turin a chah.

Maumuala LSC ram nei intel khawm, Maumual Land Owners’ Association chuan April 24, Ningani khan CM Lalduhoma an hmu a, Maumuala LSC neite'n harsatna an tawhte leh a panna kawng ṭha zawka siam leh tui connection dilnate an thlen. CM hian an harsatna chinfelpui a tum thu a lo hrilh niin ram neitute chuan an sawi.

Chief Minister chuan, Maumualah a tira MNF returnee ram pek chin (phase I) bik re-survey zawh hunah ram âwl a awm a nih pawhin mimal hnenah pek a duh loh thu a sawi a; Maumual chu veng nuam tak din theihna tur a nih thu sawiin, vantlang ram turte chu khawtlang tana ṭangkai taka hman a nih theih nan humhalh tlat turin ram neitute a chah.

Maumual ram hi MNF returnee-te tana sorkarin kum 1987 vela a pek a ni a, hun rei tak hman ṭangkai lohin a awm tawh. Ram enfiah nawn (re-survey) niin, pawmpui mai hmabak nia an hriat thu thlenin ram neitute chuan, re-survey chu pawmpui tur leh a rang lama in sak phalna pe turin an ngen a ni.

MNF returnee-te hnena Maumuala ram pekte zinga eng emaw zat chu mi dangte'n an lei chhawng tawh niin an sawi.

Maumual Land Owners’ Association hian CM Relief Fund atan Rs 23,400 an hlan nghal a ni.