Dampa Tiger Reserve-a thawkte'n Sorkar chunga an lawm thu an sawi

Dampa Tiger Reserve-a thawkte chuan thuchhuah siamin, sorkar laipui aṭanga an hlawh tur an hmuh har ṭhin avanga harsatna an tawh ṭhinte hrethiama Mizoram sorkarin thla tin hlawh an lak theihna tur a ruahman chu lawmawm an tih thu an tarlang.

Dampa Tiger Reserve-a thawkte chuan, Project Tiger (CSS) hnuaiah mi 160 vel an thawh mek thu an tarlang a, "National Tiger Conservation Authority funding hnuaia hlawh la ṭhin kan ni a, funding lo kal hun chhung a rei ṭhin avangin hlawh hi a tlangpuiin kum khatah vawi khat kan la ṭhin. Chhungkaw châwm deuh vek kan nih avangin hlawh lak loh kârah kan buai ṭhin hle. Reserve chhunga venhimna hna (anti-poaching camp duty) thawk tura chhuah pawh harsa tih châng kan ngah ṭhin," an ti.

An harsatnate hrethiama sorkarin thla tin hlawh an lak theihna tur a ruahman chu lawmawm an tih thu sawiin, "Kan state sorkar chak takin thla tin hlawh la thei tura state sum aṭanga min pek min tiam hi a lawmawm kan ti tak zet," an ti a; ZPM sorkar chungah thinlung takin an lawm thu an sawi a ni.

Vanglaini zawhna chhangin EFCC Minister chuan, Finance changtu Chief Minister-in wildlife reserve hnuaia thawkte'n thla tin hlawh an lak theihna tur abn ruahman thu a sawi a, "Mizoram budget aṭangin thla tina hlawh an lak tur sum pûk a ni ang a, central aṭanga an hlawh tur a lo thlen hunah state sorkar sum kan pûk chu rulh leh mai tur a ni. Hei hi tun sorkar kum thar aṭang hian kalpui ṭan nghal tur a ni," a ti.