MUHCS atan hlawh cut lo turin CM ngen; A hlawhtlin loh chuan court-a kal an tum

Sorkar hnathawk pawlte intêl khawmna, Federation of Mizoram Government Employees & Welfare (FMGEW) chuan April 24, Ningani khan Mizoram Universal Healthcare Scheme (MUHCS) an zawm duh rih loh thu leh MUHCS atana an hlawh 'cut' lo tur ngenna Chief Minister-ah ziakin an thlen. Ngenna a hlawhtlin loh chuan court-a kal an tum thu an tarlang.

FMGEW hian April 23, 2025 khan an member-te hriat tur a tichhuak a; danhremite'n an ràwn angin an thutlukna sawi nawnna leh an hlawh la ṭhen (deduct) lo tura ngenna CM hnenah lehkha thehluh leh tum a nih thu an tarlang. Chumi bawhzui chuan April 24 khan FMGEW hruaitute'n CM hnenah ziakin an thil duhte an thlen a ni.

An member-te tana hriat tur an tihchhuahah FMGEW chuan, "Sorkar chuan kan ngenna tihlawhtling loin April 1, 2025 aṭanga MUHCS min hman luihtirin, kan hlawh deduct-na tur head-te thlengin a rawn siam ta. April 1, 2025 aṭanga sorkar hnathawkte harsatna tawhte leh sorkar aṭanga thuchhuah thar eng emaw zat siam ngai hian a system la inpeih lohzia a lantir," an ti.

FMGEW chuan, system felfai lo chunga an luhpui avangin damlo inenkawlna chungchanga harsatna tâwk an awm chho mawlh mawlh reng nia tarlangin, "Hetiang a nih avang hian OB-te chuan conference thutlukna angin legal option an explore mek. Danhremite min ràwn angin naktuk (April 24, 2025) hian kan thutlukna sawi nawnna leh kan hlawh deduct lo tura ngenna CM hnenah lehkha thehluh leh tum," an ti a; an ngenna sorkarin a tihhlawhtlin loh chuan a ṭul angin court kal tura inbuatsaih an rêl thu an tarlang.