KHAWTHLIR

Thisen pe

April 26, Inrinni khan ṬKP, Aizawl East Pastor Bial chuan ZMCH tan thisen unit 53 an pe a, petute mipa 48 leh hmeichhia panga an ni. PYD, Theiriat bialin Lunglei Civil Hospital tan thisen unit 21 an pe a, petute mipa 15 leh hmeichhia paruk an ni a; YMA, College Veng Branch member mipa pakua leh hmeichhia pahnihte pawhin Kolasib District Hospital tan unit 11 an pe bawk.

UPC inkhawmpui

United Pentecostal Church ( North East India) General Conference vawi 57-na, April 24, 2025-a Chhimtuipui District Headquarters Local Church, New Siahaa ṭan chu nizan khan a ṭiak. Inkhawmpui report-a tarlan danin, UPC NEI-ah hian district 12 leh field pathum a awm a; member 1,21,404 awmin, mipa 59,513 leh hmeichhia 61,891 an ni.

Cess vbc. 26.50 hmuh a ni tawh

Mizoram sorkar chuan petrol leh diesel aṭanga chhiah (cess) a lak hnuah cheng vbc. 26.50 a hmu tawh. Petrol leh diesel-ah hian road Maintenance cess leh social infrastructure & services cess litre khatah Rs 2 ve ve zel lak a ni a, September 2024-ah lak ṭan niin, March 2025 thleng khan cheng vbc. 13.25 ve ve hmuh tawh a ni.

Bial inkhawmpui

Mizoram Presbyterian Kohhrana pastor bial hrang hrangte chuan April 25, Zirtawpni zan aṭanga nizan thleng khan bial inkhawmpui an hmang. Bial inkhawm-puiah hian Inrinni khan nilengin rorel a ni a, nimin chawhnu inkhawmah Lalpa Zanriah Sakramen kilho a ni. Mizoram Synod hnuaiah pastor bial 298 a awm mek a, member 6,27,719 awmin, mipa 3,04,304 leh hmeichhia 3,23,415 an ni a, dan zawh kim mi 4,55,197 an awm.