Lunglei MZP-te'n vawiin aṭangin Pûkpui daiah kawng an dang dawn

Mizo Zirlai Pawl (MZP) Headquarters, Lunglei chuan sorkara an thil phût a hlawhtlin loh avangin vawiin aṭangin tiam chin awm loin Pûkpui daiah Aizawl-Thenzawl-Lunglei (ATL) road an dang dawn. Kawng an dan tur hi Lunglei leh chhim lama pawl hrang hrangin an thlawp.

MZP Headquarters, Lunglei chuan, an hmalakna turah hian Lunglei leh chhim lam mipui thlàwpna leh ṭawiawmna an ngen a; kawngpui an dan chuan zirlai exam te, Fire & Emergency Service, medical & emergency service leh tui phur lirtheite a huam dawn lo.

Lunglei MZP-te'n kawng an dan tur hi Lunglei leh chhim lama pawl hrang hrangin an thláwp a; Aizawl-Lunglei Maxicab Welfare leh Tlabung aṭanga Aizawl leh Silchar tlan ṭhinte maxicab pawlte chuan Lunglei MZP-te an thlawpna lantir nan kawng dan a nih chhungin tlan loh an rêl a, mipui hriatthiamna an ngen.

Chhimbial Chhantu, Lunglei Ṭhalai Pawl, Hnathial Ṭhalai Pawl leh Chawngte Joint NGO te pawhin thuchhuah siamin, Lunglei MZP-in kawng dan an tum chu an thlàwp thu an tarlang.

Tarlan tawh angin, Lunglei MZP hruaitute April 25, Zirtawpnia ṭhukhawm chuan sorkara an thil phût a hlawhtlin loh avangin kawng dan an rêl. ATL Road siamna tur sum pawhpên ni 15 chhunga dah lêt tura Mizoram sorkar an phûtah hmalakna a awm loh avangin April 28, 2025 zing dar 7 aṭangin tiam chin awm loin Pukpui daiah ATL Road dan ni se an ti.

Lunglei MZP hian ATL Road siamna tur sum cheng vbc 90.69 zinga vbc 45 chu hmun dangah pawhpên niin an hria a, ATL Road kawng chhe chin chu Kanghmun South leh Kikâwn inkar km. 70 vel a nih laia Pukpui leh Mausen inkar (km. 14) chauh siam tumin sorkarin cheng vbc 45.89 chauh a dah niin an ngai bawk a; chu'ngte chu duh loin April 9, 2025 khan Lungleiah lungawi lohna an lo lantir tawh a ni.

Hetih lai hian, April 9, 2025 khan PWD minister Vanlalhlana chuan Lunglei Press Club-a thuthar thehdarhtute a kawmnaah, ATL Road-a Kanghmun South leh Lunglei inkar (km. 100-164) bika hmalak tawhnate leh hmachhawpte a sawi a, "Mizoram state highway ATL Road Kanghmun South leh Lunglei inkar siam hna chu sorkar kum 4 (2024-25 - 2027-28) chhungin zawh vek tum a ni," a ti.

ATL Road chu Mizoram sorkarin a ngai pawimawh nia sawiin Vanlalhlana chuan, World Bank-in ATL Road a siam zawh hnuah km. 100-164 inkar bik enkawl leh thawm ṭhat nan Mizoram sorkarin kum 2017-2025 chhungin cheng vbc. 118.28 a pe chhuak a, chung zinga vbc. 63.07 chu ZPM sorkar hnu kum 2024 leh 2025-ah pek chhuah a nih thu a sawi.

PWD Minister sawi danin, kawng siamtu Bhagheeratha Engineering security deposit leh a pung cheng vbc 90.69 chu sorkar sum báwma a luh hnuah sorkarin kawngpui pawimawh leh ngaimawh zual lai siam nan a ruahman. ATL Road (Lunglei lam) siam nan vbc. 45.89 dah niin, Aizawl khaw chhung kawng siam nan vbc. 44.80 dah a ni a; sum indaih lohna vangin Bhagheeratha Engineering-te hnathawhna Hmuifang Division lam siamna tur sum dah a ni lo.