Zirtirtu leh thawktu dang post ruakte hnawhkhah mek a ni - Education Minister
Education minister Dr Vanlalthlana chuan April 25, 2025 khan Siahaah sorkar hotute nen an inkâwm a, a enkawl department hmunhmate a tlawh kual a; zirtirtu leh thawktu dang post ruakte a theih ang anga hnawhkhah mek a nih thu a sawi.
Dr Vanlalthlana hian zing karah a duh apiang hmuh theih turin Circuit House-ah a ṭhu a, mimal leh pawl eng emaw zatin hmuin, an duh leh mamawhte an thlen a ni.
Chawhma lamah Saiha College a tlawh kual a; thawktute nen inkâwmin, an harsatna leh mamawhte a hriatthiampui thu a sawi a; Siaha College hmasawnna tura rawtna leh mamawh an neihte chu ziaka thehlut ṭhin tura chahin, "Zirtirtu leh thawktu dang post ruak pawh a theih dan kawng kawnga hnawhkhah chhoh mek a ni," a ti a, College Library-a dah tur lehkhabu leina a pek tur thu a sawi.
Siaha College principal Prof. Abdul Hannan Barbhuiya sawi danin, Saiha College hi July 20, 1978-ah din a ni a, kum 2020-ah NAAC accreditation grade B a nei mek. Arts department pasarih awmin, zirlai 374 an awm a; zirtirtu (teaching faculty) 24 awmin, chung an zinga 12 chu a nghet loa thawk an ni.
Education Minister hian Siaha District Education Officer (DEO) pisa, Siaha Higher Secondary School leh District Institute of Education and Training (DIET)-te a tlawh zui a; DIET Girls Hostel sak mek a enfiah. Minister chuan, contract hna thawh reng rengah hna a ṭha lo a nih chuan contractor an koh tur thu leh a ṭul anga an titipui hnuah an hna a la ṭha lo fo a nih chuan an security deposit aṭanga thawh emaw, firm blacklist emaw, an hnuaia engineer thlenga blacklist a la ṭul tur thu a sawi.
Siaha DIET-a thawktute leh zirlaite nen inkawmnaah Dr Vanlalthlana chuan, DIET zirtirtute chu zirtirtu la ni turte an zirtir tih hria a, ṭha tak leh uluk taka zirtir tur leh, an tu leh fate la zirtir tura an rin ngam tur zirtirtu chher chhuah tum turin a fuih. Hnahthial leh Khawzawlah DIET din tum a nih thu a sawi bawk. Siaha DIET-ah hian zirlai 98 leh zirtirtu 11 an awm mek a, zirtirtu post ruak 7 a awm a ni.