Minister-in Lunglei Zotlanga lei tawlh a en
Disaster Management & Rehabilitation (DMR) minister Prof. Lalnilawma chuan April 25, 2025 khan Aizawl-Thenzawl-Lunglei (ATL) Road kawngpui kama Lunglei Zotlang khâm pheia lei chê vanga kawng chhak lam lei tawlh, hun rei tak kutthlak ngam loha awm tawh chu a enfiah.
DMR Minister hi Lunglei Municipal Council (LMC) chairman Lalzuithanga, vice chairman K Lalrinawma, chief executive officer Donny Lalruatsanga, Lunglei District Disaster Management Authority (DDMA) hotute leh DMR department official-te'n an ṭawiawm.
Prof. Lalnilawma chuan, Lunglei Zotlang huam chhunga kawng chhak lama lei tawlh chu kawngpuiin a tawrh lohna tur leh chhiatna nasa zawk a thlen loh nan hmalak dan tur ruahman a, bawhzui vat ṭul a tih thu a sawi a; tun dinhmuna mipui mamawhna thlir chung leh harsatna awm thei veng chunga hmalak bakah, khuarei thlira daih rei zawk tura ruahmanna lian zawk siam ṭha a tih thu a sawi bawk.
Lei tawlhna hmun ennaah hian hmalak zui dan tur sawiho a ni a; lei a chêt belh loh nan leh fûr thleng turah harsatna lian zawk a thlen belh loh nan chak zawka hmalak dan tur zir chian a, ruahmanna thar siam ṭha an ti a; a chhak lamah tui a luh loh nan tui luankawr siam dan ngaihtuah ni se, an ti. Leivûng then faia kawng tihzauh dan tur kawng zawn ni se, an ti a; a bawhzui dan tur chu LMC, Lunglei DDMA leh a kaihhnawih department-te la sawiho turin an dah a ni.