Kolasib dist-ah danin a phal chinah raltlante'n eizawnna an indap remti

Kolasib bawrhsap Robert C Lalhmangaiha hoin April 25, 2025 khan DC conference hall-ah Kolasib district-a raltlan awmna khawtlang hruaitute an ṭhukhawm a; raltlante chu danin a phal chinah anmahnia eizawnna an indap thei a nih chuan remtih ni se, an ti.

Ṭhutkhawmah hian raltlante'n fûrah harsatna an tawh loh nan fûr thlen hmain an chenna hmun thawm ṭhat ngai laite en a, a ṭul dan azirin tarpauline ngaihtuahpui ni se an ti. Raltlante awm khawmnaah a thlawna ei leh in pek a remchang tawh lo nia ngaih a nih avangin danin a phal chinah anmahnia eizawnna an indap thei a nih chuan remtihpui ni se, an ti a; mahni duhthua an khaw lama haw duh an awm chuan an haw dan tur ngaihtuahpui ni se, an ti bawk.

Meeting-a tarlan danin, Kolasib district-a khaw paliah Myanmar leh Manipur aṭanga raltlan chhungkua 70 an awm mek a; Myanmar aṭanga lut chhungkaw 17 leh Manipir aṭanga lut chhungkaw 53 an ni. Raltlan zingah mahni khuaa haw leh mai duh an awm rualin, a bikin Manipur aṭanga raltlan ṭhenkhat chu hawna tur pawh nei tawh lo leh Mizorama awm hlen duhte an ni hlawm.

Myanmar aṭanga raltlante chu sorkar laipuiin raltlan (displaced people)-ah a pawm loh avangin sorkar laipui aṭangin an tana chhawmdawlna tur ruahmanna a awm lo. Mahse, Mizoram sorkar ngenna avangin hun eng emaw chen sorkar laipuiin buhfai a pe ṭhin a, tunah chuan a titawp a ni tawh.