Car chesualah mi pakhat thi

Nimin Inrinni zing dar 8 vel khan Thenzawl leh Buarpui inkar, Thenzawl aṭanga km. 20 vela hlâah Getz car MZ01 D-9154 chesualin, kawng thlangah metre 60 vel a lum a, mi pakhat a thi.

Thu dawn danin, car hi a neitu Imanuel Lalremruata'n a khalh a, mi panga an chuang. Rodinliani w/o Lalnunthara, Thenzawl UPC Veng chu a hmunah a thi a ni. Imanuel Lalremruata chu a hliam avangin Thenzawl damdawi-inah lak a ni a, ngaihtuahawm a ni lo. Car hnunga chuang mi dang pathumte erawh chuan hliam ná an nei lo thung.