Thailand rama health system zir ṭan

Mizoram Health department official-te chuan Health & Family Welfare minister Lalrinpuii hoin nimin khan Thailand khawpui Bangkok-a Centura Life Convention Centre, Chaeng Watthana-ah Thailand rama health system kalphung zirchianna an ṭan.

Sorkar thuchhuah tarlan danin, he learning visit hi Mizoram State Health System Strengthening Project (MHSSP) hnuaia tih tur hmachhawp pakhat a ni a, kum 2021 aṭanga ruahman tawh ni mah se, harsatna hrang hrang avangin tunah an kal thei chauh a, an senso chu MHSSP-in a tum vek a ni.

Thailand ramah hian ni nga chhungin health security leh public health care system chungchang an zir chiang dawn a; public hospital leh primary health centre-te an tlawh ang.

Thailand health system hi Mizoram Health department official-te chuan kum 2019 khan zirchianna hmasa an nei tawh a, tunah hian healthcare buaipuitute leh hotu dangte'n chîk zawkin zirchianna an nei leh dawn a ni. Mizoram aṭanga kalte hi Thailand National Health Security Office-in an lo dawngsawng a ni.