KHAWTHLIR

Ramsa leh sava veh leh kah khap

Serchhip district magistrate Paul L Khuma chuan hriattirna chhuahin, Serchhip district-ah ramsa leh sava veh leh kah khap a nih thu a puang. Thupek zâwm lote chu BNS 2023 Section 223 hmanga hrem theih an nih thu a tarlang bawk.

SA officer thar

Salvation Army, India Eastern Territory Champions of the Mission Session 2023 - 2025 cadet mi 17 chu April 27, Pathianni zan khan Aizawl Temple Corps-a thianghlimna inkhawmah Salvation Army officer atan nemngheh an ni. Officer tharte hi lieutenant rank pek an ni a, territorial commander Col. Lalhmingliana'n nemnghetin a tir chhuak a ni.

Election training

Joint chief electoral officer Ethel Rothangpuii, chief electoral officer mawhphurhna chelh mektu hoin nimin khan district hrang hranga election officer-te'n inthlan kaihhnawiha hmasawn dan tur an sawiho. Ethel Rothangpuii chuan, Election Commission of India-in tih tur a ruahmante chak taka bawhzui kawngah ṭan la thar turin election officer-te a chah.

Sholarship sawiho

Nimin khan Khawzawla sorkar hotute'n Khawzawl district-a pawl 9 leh pawl 10 zirlaite'n kim taka pre-matric scholarship an dawn theih nana hmalak dan tur an sawiho. Ṭhutkhawm hi Khawzawl bawrhsap K Vanlalṭhiana'n a kaihruai a; scholarship atan Aadhaar card neih a ngaih avangin pawl 9-10 zirlaite Aadhaar-ah an inziah luh vek theih nan Aadhaar camp buatsaih ni se, an ti a; scholarship chungchanga pawimawh inhrilhfiahna a zau thei ang bera buatsaih an rel bawk.

Science zirhona

Kendriya Vidyalaya, Aizawl chuan nimin khan an sikulah 'Promotion of Science and Technical Education in Young Minds’ tih thupui hmangin science workshop an buatsaih. Workshop hi principal Jaibir Singh-in a kaihruai a, Prof. Ravi P Singh, IIT Delhi-in science chungchang a zirtir a; JEE, NEET leh CUET hmachhawn dan inzirtir a ni bawk.

Ṭanpui tur thlang

Khawzawl district bawrhsap K Vanlalṭhiana kaihhruaiin nimin khan Prandhan Mantri Awas Yojana - Housing for All 2.0 (PMAY 2.0) hnuaia in sak ṭanpuina dawng tur mi 43 thlan a ni a; mi 43-te hian in sakna tur Rs 2,50,000 ṭheuh an dawng dawn. Ṭanpuina dawng tura thlante hi PMAY dan angin thla tin Rs 25,000 aia tam lo la lutte an ni.

Ruihhlo do inzirtir

Social Welfare department leh Foundation for Drug Free, Mizoram chuan nimin khan Kolasib-a St. Maria Goretti's School-ah ruihhlo ṭhat loh zia inzirtirna an buatsaih. Resource person Rinsangzeli Vanchhawng-in zirlaite chu ruihhlo chungchanga hriattur leh tih loh turte a lem nen entirin a hrilhfiah a; ruihhlo laka fihlim turin zirlai 440 an intiam a ni.

Disaster training

Phullen RD Block huam chhunga Village Disaster Management Committee aiawhte pualin nimin khan Saitual DC conference hall-ah training buatsaih a ni. Training hi Saitual additional DC Lallawmawma'n a kaihruai a, DMR zonal officer Christina Lalnunfeli, SDC-in thil pawimawhte a hrilhfiah a ni.