Lirtheia chetsualna pumpelh dan tur sawiho

Kolasib District Road Safety Committee chuan nimin khan an chairman Robert C Lalhmangaiha, bawrhsap kaihhruaiin lirtheia chetsualna thleng ṭhin pumpelh theih dan tur leh hmalakna dan tur an sawiho.

Robert C Lalhmangaiha chuan, Kolasib district-a kawngte a ṭhat tâk avangin lirtheite pawh an tlan chak ṭhin thu a sawi a, "Lirthei khalhtute fimkhur tâwk loh avanga lirtheia chetsualna a thleng ṭhin hi a pawi hle. Kawng ṭha kan neih hi lirthei khalhtute'n an hman thiam loh chuan chhiatpuina leh mi dang tana him lohna thlen thei a ni," a ti a; lirtheia chetsualna a tlem zawk theih nan uar lehzuala inzirtirna leh hmalakna neih a ṭul thu a sawi.

Kolasib SP David H Lalthangliana pawhin thu sawiin, lirthei khalhtute himna tura hma an lak tawh dante a tarlang a; hmun hrang hrangah inzirtirna an kalpui bakah license, helmet, document leh rui chunga lirthei khalh an awm leh awm lohte an endik reng ṭhin thu sawiin, "Duh angin hmanrua kan nei ṭha tâwk lo a, hmanraw ṭhenkhat - breath analyzer leh a dangte pawh a hlui tawh avangin khauh taka kalpui tum pawhin duhthusama hmalak a har ṭhin," a ti.

Ṭhutkhawmah hian inzirtirna, traffic management, dan kenkawhna, dan bawhchhiate hremna leh hmanraw neih leh mamawh chungchangte sawiho a ni a; PWD Executive Enghineer, Kolasib District Transport Officer leh Chief Medical Officer te pawh an tel a ni.