Patient Attendants Shelter hawng

Lawngtlai East bialtu MLA Dr Lorrain Lalpekliana Chinzah, adviser to CM (Health) chuan nimin khan Lawngtlaia Christian Hospital-ah damlo buaipuitute awmna tur, Patient Attendants Shelter a hawng.

Dr Lorrain Lalpeklian Chinzah chuan, sorkarin mipui harsatnate sukiang turin nasa taka hma a lak thu leh department hrang hrang hotute pawhin theihtawp an chhuah thu a sawi a, "Lawngtlai district mipuite'n hmasawnna an neih theih nan sorkar laipui scheme awm thei ang angah chak takin hmalak a ni. Sorkar kal mekah mitthi ruang phurh pawh changtlung taka kalpui niin, party inthliarna awm loin a mamawh apiang tan a thlawna phurh ṭhin a ni a, kut hnathawktute tan pawh theihtawp chhuah a ni," a ti.

Christian Hospital, Lawngtlaiin Mizoram Universal Health Care Scheme an zawm chu a lawm thu sawiin MLA chuan, "Sorkarin a intiam angin a tak a kalpui tum a ni," a ti a; Patient Attendants Shelter-a hman tur fan panga leh carpet a pek tur thu a sawi bawk.

Patient Attendants Shelter hi UDPA kaltlanga 'Center for Urban Wellness scheme' hnuaiah Rs 46,79,600 hmanga sak a ni a; pindan pathum leh khum 10 ve ve awmna mipa leh hmeichhia dormitory bakah, living room, choka leh inthiarna panga a awm a ni.