Mawi lo taka social media-a an inpholan chungchangah hma kan la dawn - MHIP President

Mizo Hmeichhe Insuihkhawm Pawl (MHIP) General Headquarters hruaitu tharte chuan nimin khan hruaitu hluite aṭangin mawhphurhna (charge) an la. President thar Lalliani chuan, Mizo hmeichhiate mawi lo taka incheia social media-a an inpho lang ṭhin chungchangah hma an lak dawn thu a sawi.

Lalliani chuan, Mizo hmeichhiate tana ṭan lak chu an hna pui ber tur a nih thu a sawi a, "Mizo hmeichhiate mawi lo taka incheia social media-a kan inpholan ṭhinaahte hian kan theih ang tawkin hma kan la dawn. Gutkha khap chungchangah MHIP-te'n hma kan lo la tawh ṭhin a, chu'ngte chu chhunzawmin vawiin aṭang hian ṭan kan la sauh sauh dawn a ni," a ti.

MHIP president kalchhuak Ngurmawii Sailo kaihhruaiin charge inhlan a ni a; kum 2025-2027 atana MHIP hruaitu turte chu - president Lalliani, vice president Ngurmawii Sailo, general secretary Prof. Irene Lalruatkimi, assistant secretary Prof. Zokaitluangi, treasurer Vanlaldiki leh finance secretary Lalthanmawii te an ni.