Fûr atana inbuatsaih dan tur sawiho

Champhai District Disaster Management Committee (DDMC) chu an chairman Mohammad Aaquib, bawrhsap hoin nimin khan DC conference hall-ah an ṭhu a; fûr lo thleng tur atana inbuatsaih dan turah sorkar department leh khawtlang hruaitute thawhho dan tur an sawiho.

Mohammad Aaquib chuan, fûr thleng tur atan chak taka inpuahchahna kalpui a ṭul thu a sawi a, "Chhiatna hrang hrang thleng thei laka mipuite an lo him theih nan theihtawp chhuaha inbuatsaih a ngai a ni," a ti a, DDMC member-te thawhpuina a ngen.

Ṭhutkhawmah hian, chhiatna a thlen palha rang taka che chhuak nghal thei turin District Emergency Operation Centre (DEOC) chu Quick Response Team (QRT)-te'n engtik lai pawhin ṭhutchilh ni se, an ti a; awlsam zawka biakpawhna tur phone number ruahman te, QRT leh Aapda Mitra bakah Village Disaster Management Committee-te tan training buatsaihte an rel.

Leimin, tuilian leh tuihâwkte'n vantlang kawng a tihchhiat loh nana hmalak dan tur te, electric hrui leh ban chhia leh tlu mai thei enfiah dan tur te, fur laia tui thianghlim intur a awm reng theih dan turte an sawiho bawk.