Krismas-ah swab sample test lo Covid-19 vei hmuh belh a ni lo

Krismas ni, December 25 khan Mizoramah swab sample endik a awm loh avangin Covid-19 vei hmuh chhuah an awm lo. Nimin khan hripui laka fihlim tawh mi 10 chhuahtir an ni.

IDSP tarlan danin, nimin khan Covid-19 laka fihlîm tawh mi 10 chu enkawlna hmun aṭangin chhuahtir an ni a; SRH-ZMC aṭangin mi panga, Durtlang BSUP CCC aṭangin mi pakhat leh Lawngtlai CCC aṭangin mi pali an chhuak.

Mizorama Covid-19 vei mi 4,178 hmuh chhuah tawhte chu mipa 3,073 leh hmeichhia 1,105 an ni a; nimin tlai dar 5 thleng khan damin mi 4,046 (96.84%) chhuahtir an ni tawh a, mi pariat (0.19%) thi tawhin, enkawl mek mi 124 (2.97%) an awm.

SRH leh CCC hrang hranga hripui vanga enkawl mek mi 124 zinga mi 110 (88.71%) chu civil mi an ni a; BSF sipai pariat, Assam Rifles sipai pakhat leh CRPF mi panga enkawl mek an ni bawk.

Mizorama Covid-19 positive hmuh chhuah tawh mi 4,178 zinga mi 1,980 chu Mizoram chhunga kái an ni a, mi 2,198 chu state páwn aṭanga rawn lût an ni.