National Girl Child Day hman a ni

Beti Bachao Beti Padhao (BBBP) hmalakna hnuaiah nimin khan Mizorama district khawpui ṭhenkhatah National Girl Child Day hman a ni a, naupangte'n kawng an zawh. Thupui chu - 'Educate the child, save the girl child' tih a ni a, thutiam sawi rual a ni.

National Girl Child Day hi nimin zing khan Social Welfare minister Dr K Beichhua chenna in tualah hman a ni a; Minister chuan, National Girl Child Day chu hmeichhe naupangte'n rahbi thar, him, ral­muang leh thlamuang zawka an zawh theihna tura hmalak nan hman ṭhin a nih thu a sawi. Inkhawm hi Women & Child Development director Vanlalpianpuii'n a kaihruai a; Dr K Beichhua chuan, ram dinhmun thlirin, hmeichhe dinhmun a pawimawh hle tih sawiin, "Harsatna an tawh ṭhinte sutkianpui turin theihtawp kan chhuahpui hi Mizo mipuite tih tur a ni," a ti.

National Girl Child Day pual hian Aizawl Civil Hospital-ah nimina nau piang, hmeichhiate hnenah lawmna thuziak leh pawisa hlan a ni. Serchhipah chuan District Task Force on BBBP bultumin National Girl Child Day pualin hmun hnih aṭangin kawngzawh (rally) buatsaih a ni a, sikul hrang hranga hmeichhe naupangte an tel. Serchhip Bazar aṭangin kawngzawhte leh Serchhip College péng aṭanga kawngzawhte chuan DC pisa tual an pan khawm a, DC pisa tualah district bawrhsap Dr Lalzirmawia Chhangte hoin hun hman a ni.

Dr Lalzirmawia Chhangte chuan, India ramah hmeichhiate'n endawng an tawh ṭhin thu sawiin, nuin an pai lai aṭanga tihtlak te, naupan laia enkawl ṭhat loh bikte a awm fo tawh ṭhin tih a sawi a, "Chutiang thil ṭha lo chu nuaibo a nih theih nan sorkar laipui chuan kum 2015 aṭang khan Beti Bachao Beti Padhao hmalakna a kalpui ṭan a, Mizoramah pawh Siaha leh Serchhipah kalpui a ni," a ti.

Serchhip DC chuan, BBBP-in a tum ber chu - hmeichhe naupangte venhim leh lehkha zirtir a nih thu sawiin, rally-a tel hmeichhe naupangte chu tum fel tak nei a, an thil tum thleng tura nasa taka lehkha zir turin a fuih a; nu leh pate pawh an fanute'n an theiha an peih chhung chu lehkha zirtir turin a chah.

Kolasib-ah chuan DC pisa tualah district bawrhsap Sangchhin Chinzah hoin National Girl Child Day hman a ni a; bawrhsap chuan, nute hlutzia sawiin, hmeichhiate chu duat thiam a, zirna ṭha leh mipate chanvo ang an dawn a pawimawh thu a sawi. Sangchhin Chinzah chuan, India ramah mipa leh hmeichhe naupang dinhmun inthlauhna nasa tak awm ṭhin a, chu chuan sex ration dinhmun a tichhe ṭhin tih sawiin, "Fapa neih duh vanga nau pai lai aṭanga mipa nge hmeichhia tih hriat lâwk tum an awm ṭhin a, hmeichhe nautê tihtlak a tam phah a ni," a ti a; chutiang thil ṭha lo chu Mizoramah erawh hriat tur a awm mang loh thu a sawi a ni.

Champhaiah chuan DC Conference Hall-ah district bawrhsap SL Naveen hoin hman a ni a, additional DC Mark Lalthanliana'n thu a sawi. Addl. DC chuan, India sorkarin hmeichhe naupangte chawisan a, an zahawmna vawnhimsak a ngai pawimawh tih sawiin, "National Girl Child Day hmang hian mi tinte’n kan thinlungah hmeichhe naupangte dinhmun chawikana ngaihsak hlutna tuh ṭheuh kan tum tur a ni," a ti.National Girl Child Day hi sorkar laipuia Ministry of Women and Child Development ruahmannain kum 2008 aṭangin kum tin January 24-ah hman ṭhin a ni.