Lunglei MZP-in kawng an dang leh; Hmun hnihah kawng an dang tawh
MZP Headquarters, Lunglei chuan Aizawl-Thenzawl-Lunglei (ATL) road siamna tur sum pawh pên nia ngaia kawng an dan chu nimin khan an chhunzawm a, hmun pahnih - Pukpui dai leh Hrangchalkawnah an dang.
Lunglei MZP-te hian sum pawh pên nia an ngaih dah lêt tura sorkar phûtin April 28, Thawhṭanni zing dar 7 aṭangin Pukpui daiah ATL road an dang a; niminah chuan Pukpui dai bakah Hrangchalkawnah NH kawngpui an dang. NH kawngpui an dan tel avang hian Siaha leh Lawngtlai pan tur lirthei eng emaw zat an tangkhang a ni.
Kawngpui dannaah hian Lunglei MZP-te hi Lungleia Zoram Drivers Union Sub-Hqrs, Lunglei District Maxicab Owners Association, Aizawl-Lunglei & Lunglei-Aizawl Joint Maxicab Welfare, ZORO, Lunglei Ṭhalai Pawl leh Chhimbial Chhantu hruaitute'n an ṭawiawm.
Niminah he thu ziah lai thlengin kawng dan a nih chungchangah hian Lunglei MZP-te chu Mizoram sorkarin a dawr lo a; an kal zel dan tur ngaihtuahin Lunglei MZP-te chu an ṭhukhawm a ni.
Hetihlai hian YMA Sub. Hqrs., Lunglei nimina ṭhukhawm chuan Lunglei MZP hmalakna chu Mizoram chhim lam mipui aw a ni tih hriaa, a hma thei ang bera tihhlawhtlin sak turin sorkar an ngen.