Kawngpuia thil dah hnawktute pawisa chawitir dawn

Serchhip District Road Protection Squad team-B chuan nimin khan Serchhip khawpuia Vengchung, Field Veng leh Dinthar Veng VC huam chhunga kawngpuite an endik a, kawngpuia thil dah hnawkte chu pawisa chawitir an rêl.

Serchhip District Road Protection Squad hian kawngpui an endik hmasaka lirthei leh mipui veivahna atana hnawk thei thil dahtute insenghawi tura an lo hriattir tawh zinga a tam zawkin hma an lak ṭhat hle laiin, hma la lo eng emaw zat la awmte chu pawisa chawitira hrem an rel a ni.

Serchhip District Road Protection Squad hi team pali-ah an insiam a, sorkar official-te bakah tlawmngai pawl hruaitute leh joint VC hruaitute an tel. Serchhip khawpui chhunga VC chan insemin a tahtawlin kawngpui an endik ṭhin.

Serchhipa kawngte a him leh him loh te, vantlang tana hnawk thama kawngpui nêk an awm leh awm loh te, kawngpui kama dawr leh workshop neite'n kawng an nêk leh nêk loh te, garage nei loa kawngpui sira lirthei riah ṭhin an awm leh awm lohte endik ṭhin a ni.