KHAWTHLIR

ELC exposure prog

Ministry of Information & Broadcasting hnuaia cheng nuai 100 hmanga Champhai New Market (CHANEM)-a din Experiential Learning Centre (ELC) enkawltu, ELC Management Committee chu nimin khan an chairman Mohammad Aaquib, bawrhsap hoin an ṭhukhawm. Champhai district-a sikul leh college zirlaite tan May 16, 2025-ah ELC Exposure Programme huaihawt an rel a; zirlaite tan a thlawninb ELC tlawh theih a ni ang.

Serchhip Auditorium sakna tur sawiho

Serchhip Auditorium thar sakna tur hmun rawtnate zir chiang tura din Site Selection Committee chu nimin khan additional DC Lalrinzuala hoin an ṭhu a; hmunhma rawt zingah Bukpui rama Power & Electricity ram bul chu auditorium sakna tura ruahman an rêl. Serchhip Field Vengah auditorium din ni tawh mah se, mipui tana him loa hriat a nih avangin April 7, 2025-a khawtlang hruaitute leh sorkar hotute ṭhukhawm chuan ṭhiah an rel a ni.

ZPM-in tawrhpui

ZPM party chuan thuchhuah siamin, April 28, Thawhṭanni tlaia Lengpui aṭanga Aizawl pana tlân lai lung tlain a delh hlum Lalrinliana, Falkland vengte chhungkua an tawrhpui thu an tarlang a, "Chhungkaw pa ber Pu Lalrinliana leh a nupui Pi Lungtiawii, secretary, ZPM Falkland Unit bakah an fanu Vanlalhruaii te kan uiin kan sûn tak zet. Hliam na tak tuara Aizawl Civil Hospital-a awm mek Lallawmzuala, finance secretary, ZPM Falkland Unit pawh dam ṭha leh ngei se tih hi kan ṭawngṭaina a ni," an ti.

Raltlan tan lehkha pawimawh neih phal lo

Mamit district magistrate K Laltlawmlova chuan thupek chhuahin, Mamit district-a Myanmar raltlan awmte'n India khua leh tui nihna - Aadhaar card, voter ID, ration card, etc. an nei thei lo tih a tarlang. "Hetiang document nei an awm a nih chuan cancel tur a ni. Mi tu mahin raltlante'n document an neih theih nan an ṭanpui tur a ni lo a, lo ṭanpui an awm a nih chuan an chungah dan angin action lak a ni ang," a ti.