Lung tlain a delh hlum mi 3-te Mizoram sorkarin râlna a hlân

Falkland venga chhungkaw pakhata mi pathum, April 28, Thawhṭanni tlaia Lengpui daia lung tlain a delh hlumte chu nimin khan vui an ni a, Mizoram sorkarin a ràlna Rs 12,00,000 hlan nghal a ni.

Lalrinliana leh a nupui Lungtiawii leh an fanu Vanlalhruaii te hi nimin chhun dar 12 khan Falkland Presbyterian Kohhran Hall-ah vui an ni a; vuinaah hian Disaster Management & Rehabilitation minister Prof. Lalnilawma, bialtu MLA minister Lalthansanga leh sorkar aiawhte'n Mizoram sorkarin a ràlna an hlân.

Khuarel chhiatna vanga thite hnenah Mizoram sorkar chuan mi pakhat Rs 4,00,000 zelin a rál ṭhin a; Lalrinliana leh a nupui leh a fanu te hi Rs 4,00,000 ṭheuha ràl niin, a vaiin Rs 12,00,000 a ni.

DMR minister Prof. Lalnilawma chuan, khuarel chhiatna vanga Lalrinliana te chhungkaw vanduaina chu sorkarin pawi a tih tak zet thu a sawi a, "An fapa Lallawmzuala, hliampui tuara Aizawl Civil Hospital-a awm mek hi kan lainatin dam ṭha leh ngei se tih hi kan ṭawngṭaina a ni. Sorkar aṭanga kan tih theih chhun ràlna hi kan sûnna leh tawrhpuizia lantirtuah min lo pawmsak turin chhiat tâwk chhungte kan ngen a ni," a ti.

Bialtu MLA Lalthansanga pawhin thu a sawi a; minister-te hi DMR secretary K Lalrinzuali, director Lalhriatpuia leh hotu dangte'n an ṭawiawm a ni.