SWMC environmental clearance sawiho

Urban Development & Poverty Alleviation department hnuaia Lunglei khawpui bawlhhlawh sawngbawlna tur Solid Waste Management Centre (SWMC), Riangvai Thlanmual bula din tur chungchangah nimin khan sorkar laipui aṭanga environmental clearance lakna turin project-in a kaihhnawih khua/veng mipui ngaihdan lakna vantlang inkhawm (public hearing) buatsaih a ni.

Lunglei Convention Centre conference hall-a vantlang inkhawm hi Mizoram Pollution Control Board (MPCB) huaihawt a ni a, Lunglei additional DC Zoramdini'n a kaihruai. Lunglei DFO Lalduhthlana, MPCB environment engineer PC Lalmuanpuii leh thawktu dang te, UDPA leh department dang official te, project consultant - Eco-Management Services leh Voyants Solution aiawh te, project chhehvela khua/veng hrang hrang khawtlang hruaitu, tlawmngai pawl aiawhte leh project ngaihventute an tel.

Public hearing-ah hian Lunglei SWMC dinna tur project kalpui tur chungchanga ngaihdan, zawhna leh rawtnate sawiho a ni a; project pawimawhna te, environment lama nghawng a neih theih dan tur leh chutiang harsatna awm thei tihnep leh sutkian dan turte sawiho a ni bawk.