NCST-te'n Siaha an tlawh

National Commission for Scheduled Tribes (NCST) chairman Antar Singh Arya leh member dangte chuan nimin khan Siaha an tlawh a, helipad-ah district thuneitute leh Mara Autonomous District Council hotute'n an lo hmuak.

MADC Chief Executive Member bangla tuala inkhawmah NCST Chairman chuan, tribal-te tana thawk tura din an nih angin scheduled tribe (ST)-te hamṭhatna turin kawng hrang hrangin hna an thawk ṭhin tih a sawi a, "President leh Prime Minister pawhin kawng hrang hranga tribal-te hmasawnna an ngai pawimawh tak zet a ni," a ti.

Antar Singh Arya chuan, hnam anga an dinchhuah a, hma an sawn zel theih nan dikna leh rinawmna nen ram leh hnam tan theihtawp chhuah turin kal khawmte a chah a; zirlai naupang kal khawmte chu ram hruaitu la ni turte an nih avangin ṭang sauh sauh turin a fuih bawk.

Siaha district bawrhsap VL Hruaizela Khiangte chuan, Siaha district dinhmun tlangpui a tarlang a; an district hmasawnna atan theihtawp chhuahpui turin NCST hotute a ngen.

NCST hotute hi Siahaa pawl hrang hrang - ECM Assembly, Mara Thyutlia Py (MTP), Mara Chano Py (MChP), Mara Students Organisation leh MHP hruaitute'n an kâwm a; chumi hnuah MADC leh LADC-a hotute nen an inkâwm leh bawk.