MP hlui Ronald Sapa Tlau a thi; May 2, Zirtawpni-ah vui a ni dawn

Mizoram Rajya Sabha MP hlui Ronald Sapa Tlau (71) s/o Chhuanvawra Tlau (L), Zonuam, Aizawl chu nimin zing dar 8 khan All India Institute of Medical Sciences (AIIMS), Delhi-ah a thi a; a ruang vawiinah Aizawl thlenpui tum niin, naktuk Zirtawpni-ah vui a ni ang.

Ronald Sapa Tlau hi lung (heart) ṭha lo nei niin, April 6, 2025 khan inenkawl turin Delhi an pan a; April 28 khan AIIMS-ah a lung zai a ni a, ṭha chhuak zo loin nimin zing dar 8 khan a thi ta a ni.

Mizoram Congress party-a vice president ni mek Ronald Sapa Tlau hi February 4, 1954-ah Serchhip district-a Hualtu khuaah a piang a, a nupui chu Ramthanpari Tlau niin, fapa pahnih leh fanu pakhat an nei. Spicer Adventist University, Pune-ah a graduate a, Howard University, Washington, USA aṭangin Post Graduate in Rural Development a zo bawk.

Ronald Sapa Tlau hi July 2014 aṭanga July 2020 thleng Rajya Sabha member a ni a, MP a nih chhungin parlia-mentary committee pathum - Health and Family Welfare of India, Science and Technology leh Information Technology-ahte member a ni.

Ronald Sapa hian Congress party-ah nihna pawimawh tak tak a chelh tawh a; MPCC general secretary, MPCC Media chairman leh chief spokesman, MPCC Communication chairman te a lo ni tawh a; kum 2009-2013 chhung Zoram Electronics Development Corporation Limited (ZENICS)-ah chairman a ni. MLA inthlanpuiah candidate a lo ni tawh ṭhin bawk.

Thu leh hla lamah pawh Ronald Sapa hian sûlhnu a nei nual a; kum 1985-ah 'Raltiang ram', kum 1996-ah 'Zoram thar (New Mizoram)' tih leh kum 2002-ah Hindu kulmut leh India sakhua zalenna' tih lehkhabute a chhuah. Hla a phuah nual bawk a, ‘Khawvelah lawmna ka zawng a’ tih hla a phuah chu Mizo zinga hriat hlawh tak a ni.