Mizorama ST tana hmalak dan thlir

National Commission for Scheduled Tribes (NCST) chairman Antar Singh Arya hoin nimin khan Secretariat conference hall-ah Mizorama scheduled tribe-te dinhmun leh ST tana scheme-te hmanga hmalak dan thlir let a ni a; NCST Chairman chuan Mizoramah Hindi medium school hawn dan kawng zawn ni se a duh thu a sawi.

NCST chairman Antar Singh Arya chuan, Mizoramah Hindi ngaih pawimawha inzirtir ṭul a tih tghu sawiin, "Mizoramah Hindi medium school hawn dan kawng zawn ni se a ṭha. Mizoram sorkar hotute pawh tribal vek in ni a, mahni tribal-pui leh hnampuite hmasawnna atan theihtawp chhuah ang che u," a ti a; tlang ram lo neih dan bansan nan project siam ṭha a tih thu a sawi bawk.

NCST member Nirupam Chakma chuan ST-te dinhmun chawikanna atana NCST mawhphurhna leh thuneihnate a tarlang a; Mizoram mipuiin NCST hnathawh dan leh ST-te tana hma an lak theihnate an hriat theih nan ṭan lak a ṭul thu a sawi.

Chief secretary Khilli Ram Meena leh Planning secretary Lalmalsawma Pachuau ten Mizoram sorkarin ST-te tana hma a lak dante an sawi a ni.

Ṭhutkhawma tarlan danin, Mizoram mipui zinga 94.45% chu ST an ni a, India rama state zingah mihring awm zat aṭanga chhûta ST tam berna state a ni. ST hi Nagaland-ah 86.5%, Meghalaya-ah 86.1%, Arunachal Pradesh-ah 68.8%, Manipur-ah 40.9%, Sikkim-ah 33.8% leh Tripura-ah 31.8% an awm.