Hotute'n MP hlui sûnna an tichhuak

Mizoram sorkar hotu lute'n nimin zinga thi MP hlui Ronald Sapa Tlau sûnna thu an tichhuak. Governor Gen. VK Singh chuan, Ronald Sapa'n a kalsan a chhungte a tawrhpui thu leh thlamuanna a dilsak thu a sawi a, "Rajya Sabha-a a hnathawh te, khawtlang leh ram hmasawnna leh ṭhatna tura a thawhte hriat reng a ni tawh ang," a ti.

Chief minister Lalduhoma chuan, "Ram tana kan thawhpui, ka thian ṭha, politician hlun, Rajya Sabha MP lo ni tawh Pu Ronald Sapa Tlau ka ui hle mai. A nupui fanaute Pathianin awmpuiin thlamuan rawh se," a ti a; Mizoram tana a hnathawhte avangin a chungah a lawm thu leh an thinlungah a chàm reng tawh dawn thu a tarlang.

Home minister K Sapdanga chuan, Ronald Sapa chu Mizoram tana nasa taka thâ thawh tawh ṭhintu a nih thu tarlangin, "Mizoram tana mi hlu leh pawimawh, ram hmasawnna ngaihtuah em emtu kan chán hi pawi ka tiin ka ui tak zet a ni. A kalsan tâk a chhungte leh ṭhenrual ṭhate Pathianin awmpui rawh se," a ti. Minister eng emaw zatin an uina leh sunna thu social media-ah an dah bawk.