Durtlang Leitan rama leivûng paihna vangin HC leh NGT-ah zualko tum

Durtlang Leitan ram chhung mimal ramah AMC phalnaa leivûng leh bawlhhlawh chi hrang hrang paih ṭhin tihtawp nghal a nih loh chuan Gauhati High Court leh National Green Tribunal (NGT)-ah zualko an duh thu, Muanna Veng leh Muthi khawtlang hruaitute leh Centre for Environment & Social Justice (CESJ) hruaitute'n an tarlang.

Hemi chungchangah hian Muanna Veng leh Muthi khawtlang hruaitu - LC/VC, YMA, MHIP leh MUP leh, CESJ chuan nimin khan Aizawl Bawrhsap hnenah lehkha an thehlut a; leivung leh bawlhhlawh paih titawp nghal turin an ngen a ni.

Lehkha thehluttute hian Durtlang Leitan ram chhunga mimal rama AMC phalnaa leivûng leh bawlhhlawh chi hrang hrang ṭhin chuan Muanna Veng mipui nunphung a tihbuai bakah, Muthi lui leh Tuipawl lui a tihchhiat avangin April 26, 2025 khan an enfiah.

CESJ, Muanna Veng leh Muthi khawtlang hruaitute chuan, "He laia bawlhhlawh leh leivûng paih hi tikhawtlai hlek loa titawp turin kan ngen che a. Tihtawp nghal a nih loh chuan he laia bawlhhlawh leh leivûng paih motor-in mi pahnih a sut hlum tawh vangin Gauhati High Court-ah PIL thehluh kan tum a, environment a tihchhiat nasat avangin NGT-ah complaint thehluh kan tum," an ti.

Lehkha thehluttute chuan, leivûng leh bawlhhlawh paihnaah hian sorkarin hmalakna mumal a neih hma loh chuan chhun zan zawma duty insiamin an dang rih dawn tih an tarlang a; leivung leh bawlhhlawh paihna hmun chu AMC-in phalna a pek dan chuan leivûng chauh paihna tur a nih laiin, bawlhhlawh ṭawih thei lo chi hrang hrang, in ṭhiahna hnawmhnawk ṭawih thei lo, sarâng, plastic ip chhia leh plastic tui ûm tam tak paih a nih thu an tarlang bawk.