CM-in women college din ṭha a ti

Chief minister Lalduhoma chuan Mizoramah hmeichhiate zirna tur bik college din a nih theih nan sorkar laipuiah project siam ṭha a tih thu National Commission for Scheduled Tribes (NCST) hotute a hrilh.

CM Lalduhoma hi nimin khan CMO conference hall-a NCST hotute nen an inkâwm a; Mizoram sorkar chuan working women hostel paruk a sa mek tih sawiin, "Women college hi kan inkawmna behchhan hian sorkar laipuiah project-te siam ila a ṭhat ka ring. Hindi zirna kan ngai pawimawh a, zirnaah three language formula kalpui theih ṭha kan ti," a ti.

NCST hotute'n Mizoram an rawn tlawh chu a lawm thu leh Mizoram tan rah ṭha a chhuah ngei a beisei thu sawiin Lalduhoma chuan, "Kan ADC-te'n hmasawnna hna tam zawk an thawh theih nan budget pangngai bakah hian sorkar laipui hian additional fund min siamsak thei se kan duh a, Union Minority Affairs Minister bulah pawh ka sawi tawh ṭhin," a ti a; ruihhlo tawlhruk do turin Coordination Committee chak tak din a nih thu a sawi.

Commission member-te hian Mizoram sorkarin a lo dawnsawn danah lawm thu an sawi a; an ngaih pawimawh thil hrang hrang Chief Minister hnenah an thlen. A ṭulna apiangah Mizoram sorkar ṭanpui tura an inpeih thu an sawi a; Delhi lama a zin leh hunah NCST pisa tlawh ngei turin an sáwm bawk.

Inkawmnaah hian NCST chairman Antar Singh Arya, member pathum - Nirupam Chakma, Dr Asha Lakra leh Jatothu Hussain bakah, secretary Puneet Kumar Goel leh official dangte an tel.

NCST-te hian nimin khan Mizoram an chhuah san, minister of state Lalnghinglova Hmar-in Lengpui Airport thleng a thlah.