MSSC leh Samagra ten inremna ziak

Sports & Youth Services (SYS) minister Lal-nghinglova Hmar pisaah nimin khan Samagra Shiksha leh Mizoram State Sports Council (MSSC) ten Grassroots Sports Development Programme (GSDP) kalpui dan turah inremna, Points of Agree-ment (PoA) an ziak.

Inremnaah hian MSSC secretary Henry C Lalrawnkima leh Samagra Shiksha state project director C Lalthanzira ten hming an ziak. GSDP kaltlang hian sorkar hnuaia sikulah kum 6-14 inkar zirlaite tan MSSC-in infiamna thlan bikah training an kalpui dawn a; Mizoram sorkarin Vision 2036 Olympics a neih mek hnuaia Empowering Mizoram Sports a kalpui mek nena kal dun thei tura duan a ni.

Samagra Shiksha leh MSSC hian January 13, 2025 khan thawh dunna thuthlung an ziak tawh a, chumi bawhzuina kal zelah GSDP-a an thawh dun dan tur chu nimin khan tihfel a ni. Thawh dunnaah hian Samagra Shiksha-in MSSC hnenah a bul ṭanna leh kum khatna atan Rs 92,00,000 an pe dawn a, bungraw mamawhte an tum dawn bakah, programme coordinator leh thawktu pakhat dang an dah dawn bawk.

MSSC lamin GSDP kalpui leh enkawl an buaipui dawn a ni.