Buaina leh pawikhawihna a awmin thu chiang hriat kan tum a ngai - Muanpuia Punte

Zofa Global Network (ZGN) chuan April 30, Nilaini khan Tourist Lodge, Chaltlangah 'Zofa Global Convention' an hmang a; khuallian, adviser to chief minister Lalmuanpuia Punte chuan, Mizorama buaina leh pawikhawihna thleng a awmin ráltlân an inhnamhnawih leh inhnamhnawih lohah thu chiang hriat tum hmasak a ngaih thu a sawi.

Lalmuanpuia Punte chuan, ZGN-in Zo fate inpumkhatna tichak tura culture hmanga hma an la chhunzawm zel chu a hlawk thu a sawi a; thu belhchian dâwl lo hmanga ráltlânte beihna a nasat thu sawiin, "Zirchiannaah Mizorama thilsual khawihtu zingah raltlan ni kher loin, Myanmar mi hrim hrim hi 5% chauh an awm. Buaina leh pawikhawihna thleng a awmin fimkhur taka thu chiang hriat kan tum a ngai. Hetianga ráltlânte puhna hian Zo hnahthlak inpumkhatna atan harsatna a siam nasa hle a ni," a ti.

ZGN inkhawmpui lian hi chawhma lam inkhawm chu vice president C Lalrambuatsaiha'n a kaihruai a; ZGN chapter hrang hrang - Manipur, Shillong leh Champhai aṭangin palai eng emaw zat leh Mizorama pawl leh hnam pual zirlai pawl hrang hrang an tel.

Chawhnu lamah rorel a ni a, resolution pahnih an pawm. Mizoram Journalist Association kaihhruaiin kum 2025-2027 chhunga ZGN hruaitu tur an thlang bawk.