Mizoramah Ayush dispensary din a pawimawh - HFW minister Rinpuii

Union minister of state Prataprao Jadhav hoin nimin khan Lonavala, Pune-ah National Ayush Mission Conclave ṭan a ni a, Health & Family Welfare minister Lalrinpuii telin, Mizoramah Ayush dispensary din a ṭul thu a sawi.

Conclave-ah hian state hrang hrang Ayush changtu minister leh official-te an tel a; Ayush hmachhawpte leh health programme hrang hrang kalpui dan tur te, lian zawka state hrang hranga Ayush kalpui dan turte zirho a ni.

Lalrinpuii chuan, Mizoram chu India rama best performing state thlan chhuah zinga mi a nih thu sawiin, "Mizoram chu nasa taka Ayush health programme kalpuitu kan ni a, Mizoramah Ayush dispensary din a pawimawh hle," a ti a, Ayush dispensary atana pawimawh thawktu (manpower) pe turin sorkar laipui a ngen.

Mizorama AYUSH department hnuaia hmachhawpte sawiin Lalrinpuii chuan, "Ni tin Ayush OPD bakah peripheral OPD kan kalpui a, mipuite'n an hlut em em a, chhunzawm zel kan tum," a ti a; hmun pathuma khum 10 awmna Ayush hospital sakna tur DPR, cheng vbc 22.50 senna tur a thehlut nghal.

Health Minister hi Ayush deputy director Dr S Mara Thansiami leh state programme manager Lalduhawma Chhangte ten an ṭawiawm a ni.